- తీరం దాటనున్న తీవ్ర వాయుగుండం.. ఏపీలో 9 జిల్లాలకు ఫ్లాష్ఫ్లడ్ అలర్ట్
- గంటకు 65 కి.మీ వేగంతో గాలులు.. మత్స్యకారులకు హెచ్చరిక
- విశాఖ-గోపాలపూర్ మధ్య తీరం దాటనున్న వాయుగుండం.. 3 రోజులు భారీ వర్షాలు
- తెలంగాణలో 7 జిల్లాలకు రెడ్ అలర్ట్.. వాయుగుండం ప్రభావం ఎంతంటే?
Heavy Rain Warning : బంగాళాఖాతంలో ఏర్పడిన తీవ్ర వాయుగుండం తెలుగు రాష్ట్రాలను వణికిస్తోంది. బుధవారం రాత్రి విశాఖపట్నం-గోపాలపూర్ మధ్య, ముఖ్యంగా కళింగపట్నం సమీపంలో ఇది తీరం దాటనుందని వాతావరణ శాఖ తెలిపింది.
ఇప్పటికే తీర ప్రాంతంలో గంటకు 65 కిలోమీటర్ల వేగంతో బలమైన గాలులు వీస్తుండటంతో, మత్స్యకారులు వేటకు వెళ్లొద్దని అధికారులు స్పష్టమైన హెచ్చరిక జారీ చేశారు. ప్రధాన ఓడరేవులన్నింటిలో 3వ నంబర్ ప్రమాద సంకేతాలు ఎగురవేశారు.
వాయుగుండం ప్రస్తుతం పశ్చిమ వాయువ్య దిశగా కదులుతోందని, ఈరోజు రాత్రికి తీరం దాటుతుందని వాతావరణ శాఖ వెల్లడించింది. దీని ప్రభావంతో వచ్చే మూడు రోజుల పాటు భారీ నుంచి అతి భారీ వర్షాలు కురిసే అవకాశం ఉందని అధికారులు అలర్ట్ జారీ చేశారు. ఏపీలోని 13 జిల్లాల్లో నేడు, రేపు భారీ వర్షాలు నమోదవుతాయని అంచనా వేస్తూ, ప్రజలు అప్రమత్తంగా ఉండాలని విపత్తుల నిర్వహణ సంస్థ సూచించింది.
పాఠశాలలకు సెలవు, ఫ్లాష్ఫ్లడ్ హెచ్చరికలు
తీవ్రత దృష్ట్యా వర్షప్రభావిత జిల్లాల్లో నేడు పాఠశాలలకు సెలవు ప్రకటించారు. విశాఖ, విజయనగరం, అల్లూరి సీతారామరాజు, శ్రీకాకుళం, అనకాపల్లి జిల్లాల్లో స్కూళ్లు మూసివేయనున్నారు. దీంతోపాటు ఏపీలోని 9 జిల్లాలకు ఫ్లాష్ఫ్లడ్ అలర్ట్ కూడా జారీ అయింది.
Read Also : Heavy Rain Alert : బంగాళాఖాతంలో అల్పపీడనం.. మూడు రోజులు తెలుగు రాష్ట్రాల్లో భారీ వర్షాలు.. IMD కీలక అలర్ట్
శ్రీకాకుళం, విజయనగరం, విశాఖ, అనకాపల్లి జిల్లాలతో పాటు గుంటూరు, పల్నాడు, ఎన్టీఆర్, అల్లూరి, మన్యం జిల్లాలకు కూడా ఈ హెచ్చరికలు వర్తిస్తున్నాయి. వీటిలో శ్రీకాకుళం, విజయనగరం, పార్వతీపురం మన్యం, అల్లూరి జిల్లాలకు రెడ్ అలర్ట్ ప్రకటించారు.
తెలంగాణలోనూ రెడ్ అలర్ట్ జిల్లాలు
వాయుగుండం ప్రభావం తెలంగాణపైనా పడనుంది. రాష్ట్రంలో రెండు రోజుల పాటు భారీ వర్షాలు కురుస్తాయని వాతావరణ శాఖ హెచ్చరించింది. పెద్దపల్లి, ములుగు, భూపాలపల్లి, వరంగల్, హనుమకొండ, మహబూబాబాద్, కొత్తగూడెం జిల్లాలకు రెడ్ అలర్ట్ జారీ చేశారు. వీటితో పాటు భద్రాద్రి కొత్తగూడెం, ఖమ్మం, సూర్యాపేట, మహబూబ్నగర్ జిల్లాలకు ఫ్లాష్ఫ్లడ్ హెచ్చరికలు కూడా అందాయి.
భారీ నుంచి అతి భారీ వర్షాలు కురిసే అవకాశం ఉన్నందున, ఈ జిల్లాల ప్రజలు జాగ్రత్తగా ఉండాలని, అనవసర ప్రయాణాలు నివారించాలని అధికారులు కోరుతున్నారు. లోతట్టు ప్రాంతాల ప్రజలు అప్రమత్తంగా ఉండటంతో పాటు, స్థానిక యంత్రాంగం సూచనలను తప్పక పాటించాలని విపత్తుల నిర్వహణ శాఖ విజ్ఞప్తి చేసింది.
