SSC SI 2026 : డిగ్రీ అర్హతతో 1871 సబ్ ఇన్‌స్పెక్టర్ పోస్టులు.. సెప్టెంబర్ 30 లాస్ట్ డేట్

• SSC సబ్ ఇన్‌స్పెక్టర్ నోటిఫికేషన్.. ఢిల్లీ పోలీస్, CAPF ఖాళీలు వివరాలు
• నెలకు రూ.1.12 లక్షల వరకు జీతం.. సబ్ ఇన్‌స్పెక్టర్ పోస్టులకు దరఖాస్తులు
• వయసు 20 నుంచి 30 ఏళ్లు.. SSC SI పోస్టులకు అర్హతలు ఇవే
• CBT, PET, PST దశల్లో ఎంపిక.. సబ్ ఇన్‌స్పెక్టర్ రిక్రూట్‌మెంట్ ప్రాసెస్

SSC SI 2026 : కేంద్ర ప్రభుత్వ ఉద్యోగాల కోసం ఎదురుచూస్తున్న డిగ్రీ అభ్యర్థులకు స్టాఫ్ సెలక్షన్ కమిషన్ (SSC) శుభవార్త అందించింది. ఢిల్లీ పోలీస్, సెంట్రల్ ఆర్మ్డ్ పోలీస్ ఫోర్సెస్ (CAPF)లో సబ్ ఇన్‌స్పెక్టర్ నియామకానికి సంబంధించి కమిషన్ నోటిఫికేషన్ విడుదల చేసింది. మొత్తం 1871 పోస్టులను భర్తీ చేయనుండటంతో, ఏదైనా గుర్తింపు పొందిన యూనివర్సిటీ నుంచి బ్యాచిలర్ డిగ్రీ పూర్తి చేసిన అభ్యర్థులకు ఇది మంచి అవకాశంగా మారింది.

ఈ రిక్రూట్‌మెంట్ ద్వారా ఢిల్లీ పోలీస్‌తో పాటు BSF, CISF, CRPF, ITBP, SSB వంటి కేంద్ర సాయుధ (SSC SI 2026) బలగాల్లో సబ్ ఇన్‌స్పెక్టర్ పోస్టులు భర్తీ కానున్నాయి. విభాగాల వారీగా చూస్తే, CAPFల్లో సాధారణ సబ్ ఇన్‌స్పెక్టర్ (GD) పోస్టులు 1,320 ఉండగా, ఢిల్లీ పోలీస్‌లో పురుషుల ఎగ్జిక్యూటివ్ కేటగిరీలో 205, మహిళల కేటగిరీలో 112 పోస్టులు అందుబాటులో ఉన్నాయి. అలాగే CAPFలోని ఫైర్ విభాగంలో పురుషులకు 234 పోస్టులు కేటాయించారు.

అర్హతలు, వయోపరిమితి వివరాలు

సాధారణ సబ్ ఇన్‌స్పెక్టర్ పోస్టులకు దరఖాస్తు చేసుకునేవారు ఏదైనా బ్యాచిలర్ డిగ్రీ కలిగి ఉండాలి. అయితే CAPF ఫైర్ పోస్టుల కోసం ఫిజిక్స్, కెమిస్ట్రీ, మ్యాథమెటిక్స్ సబ్జెక్టులతో డిగ్రీ చేసిన వారు లేదా సంబంధిత ఇంజినీరింగ్‌లో మూడేళ్ల డిప్లొమా పూర్తి చేసినవారు అర్హులు. ఢిల్లీ పోలీస్ సబ్ ఇన్‌స్పెక్టర్ (పురుషులు) పోస్టులకు దరఖాస్తు చేసేవారు ఫిజికల్ టెస్ట్ నాటికి తప్పనిసరిగా LMV డ్రైవింగ్ లైసెన్స్ కలిగి ఉండాలి.

Read Also : AP Vidya Volunteer Recruitment 2026 : TET పాసైన వారికి గుడ్‌న్యూస్.. 6,534 పోస్టులు, రాత పరీక్ష లేకుండానే ఎంపిక.. జీతం రూ.12,500 వరకు

వయోపరిమితి విషయానికొస్తే, 2026 ఆగస్టు 1వ తేదీ నాటికి సాధారణ పోస్టులకు అభ్యర్థుల వయసు 20 నుంచి 25 ఏళ్ల మధ్య ఉండాలి. ఫైర్ విభాగం పోస్టులకు వయో పరిమితి 18 నుంచి 30 ఏళ్ల వరకు ఉంటుంది. ఎస్సీ, ఎస్టీ అభ్యర్థులకు 5 ఏళ్లు, ఓబీసీ అభ్యర్థులకు 3 ఏళ్ల వయో సడలింపు వర్తిస్తుంది.

ఎంపిక విధానం, జీతం, గడువు తేదీలు

ఆసక్తి ఉన్న అభ్యర్థులు ఆన్‌లైన్‌లో సెప్టెంబర్ 30, 2026 వరకు దరఖాస్తు చేసుకోవచ్చు. జనరల్ కేటగిరీ అభ్యర్థులు రూ.100 దరఖాస్తు ఫీజు చెల్లించాల్సి ఉండగా, ఎస్సీ, ఎస్టీ, మహిళలు, మాజీ సైనికులకు ఈ ఫీజు నుంచి మినహాయింపు ఉంది. ఎంపిక ప్రక్రియలో మొదట కంప్యూటర్ ఆధారిత రాత పరీక్ష (CBT) నిర్వహిస్తారు.

దీనిలో అర్హత సాధించినవారికి శారీరక దారుఢ్య పరీక్ష (PET), ఫిజికల్ స్టాండర్డ్ టెస్ట్ (PST) నిర్వహిస్తారు. ఎంపికైన అభ్యర్థులకు నెలకు రూ.35,400 నుంచి రూ.1,12,400 వరకు వేతనం లభిస్తుంది, దీనితో పాటు కేంద్ర ప్రభుత్వ నిబంధనల మేరకు ఇతర అలవెన్సులు కూడా అందుతాయి.

దరఖాస్తు ప్రక్రియ సెప్టెంబర్ 10, 2026 నుంచి ప్రారంభం కాగా, చివరి తేదీ సెప్టెంబర్ 30, 2026గా నిర్ణయించారు. దరఖాస్తు ఫీజు చెల్లింపునకు అక్టోబర్ 1, 2026 వరకు గడువు ఉంది.

దరఖాస్తులో ఏవైనా సవరణలు చేసుకోవాలనుకునేవారికి అక్టోబర్ 8 నుంచి అక్టోబర్ 10, 2026 వరకు అవకాశం కల్పించారు. అర్హత కలిగిన అభ్యర్థులు గడువు ముగిసేలోపే దరఖాస్తు ప్రక్రియ పూర్తి చేసుకోవడం మంచిది.