- చెత్త వ్యాపారం నుంచి బిగ్ బాస్ వేదిక వరకు.. పొట్టి నరేష్ జర్నీ
- తొమ్మిదో తరగతితోనే ఇంత ఎదిగా.. బిగ్ బాస్‌లో నరేష్ ఎమోషనల్ మాటలు
- హైట్ తక్కువ అని ఎగతాళి చేశారు.. ఇప్పుడు బిగ్ బాస్ 10లో సందడి
- డీ జూనియర్స్‌లో రిజెక్ట్.. జబర్దస్త్ నుంచి బిగ్ బాస్ దాకా పొట్టి నరేష్ కథ
Bigg Boss Telugu 10 : జబర్దస్త్ కామెడీ షో ద్వారా టీవీ ప్రేక్షకులకు సుపరిచితుడైన పొట్టి నరేష్ ఇప్పుడు బిగ్ బాస్ తెలుగు సీజన్ 10 వేదిక మీద అడుగు పెట్టాడు. 11వ కంటెస్టెంట్‌గా హౌస్‌లోకి ఎంట్రీ ఇచ్చిన అతను, స్టేజ్ మీద చేసిన డ్యాన్స్ పర్ఫామెన్స్‌తో అందరి దృష్టిని ఆకర్షించాడు.
ఎంట్రీ ఇచ్చిన వెంటనే నరేష్ తనదైన ధీమాతో మాట్లాడాడు. బిగ్ బాస్ కప్పు కచ్చితంగా తానే గెలుస్తానని ప్రకటించిన అతను, ఇకపై గూగుల్‌లో తన పేరు వెతికితే ‘బిగ్ బాస్ నరేష్’ అని రావాలన్నదే తన లక్ష్యమని చెప్పాడు. హౌస్‌లో పూర్తి స్థాయి వినోదం పంచుతానని కూడా హామీ ఇచ్చాడు.
చెత్త వ్యాపారం నుంచి కామెడీ వేదిక వరకు
నవ్వులు పంచే నరేష్ జీవితం మాత్రం అంత సులభంగా సాగలేదు. తొమ్మిదో తరగతి వరకు మాత్రమే చదువుకున్న అతను, ఆర్థిక ఇబ్బందుల మధ్య పెరిగాడు. తండ్రి స్క్రాప్ వ్యాపారం చేసేవారని, పాత పేపర్లు, ఇనుము, బీర్ బాటిల్స్ వంటి వస్తువులు కొని అమ్మడమే వారి కుటుంబానికి, బంధువులకు జీవనాధారంగా ఉండేదని నరేష్ ఒక ఇంటర్వ్యూలో వెల్లడించాడు.
తానూ అదే పని చేశానని చెబుతూ ఎమోషనల్ అయ్యాడు. ఎత్తు తక్కువగా ఉన్నందుకు తనను చిన్నచూపు చూసిన సందర్భాలు, అవమానాలు ఎదుర్కొన్న క్షణాలను కూడా అతను గుర్తు చేసుకున్నాడు.
డీ జూనియర్స్ రిజెక్షన్.. జబర్దస్త్‌తో మలుపు
ఇంట్లోనే డ్యాన్స్ నేర్చుకున్న నరేష్, డీ జూనియర్స్ ఆడిషన్స్‌కు కూడా వెళ్లాడు. అయితే అక్కడ అతన్ని తిరస్కరించారు. కానీ అదే వేదిక మీద ఉన్న ఒక ప్రొడక్షన్ మేనేజర్ అతని నంబర్ తీసుకోవడం అతని కెరీర్‌కు మలుపు తిప్పింది. కొన్నాళ్ల తర్వాత జబర్దస్త్ షూటింగ్ కోసం పిలుపు వచ్చింది.
సుధాకర్ అనే వ్యక్తి అతనికి ఒక స్కిట్‌లో అవకాశం ఇచ్చాడు. ఆ తర్వాత ప్రకాష్, బుల్లెట్ భాస్కర్, సుధాకర్ టీమ్‌లలో పనిచేస్తూ నరేష్ క్రమంగా తన స్థానాన్ని పదిలం చేసుకున్నాడు. ఇప్పుడు జబర్దస్త్‌ను వీడి బిగ్ బాస్ హౌస్‌లో అడుగుపెట్టిన నరేష్, అక్కడ ఎలాంటి వినోదం అందిస్తాడో, ప్రేక్షకుల మనసు ఎంతవరకు గెలుచుకుంటాడో వేచి చూడాలి.